CostureArte S. Coop. Galega

Artea Joskintzatik egina

Fast fashiona merkatuan nagusi den eta gizarte-bazterkeriak emakume arrazializatu eta migratzaileei bereziki eragiten dien mundu batean sortu zen CostureArte, erantzun ausart eta eraldatzaile gisa. Ekimen hau ez da joskintzako kooperatiba bat soilik; erresistentzia-ekintza bat da, itxaropen-dei bat, eta ekonomia egiteko beste modu batzuk posible direla erakusten duen froga nabarmena.  

CostureArte aparteko hiru emakumeren —Juana, Diana eta Rosalía— topaketatik sortu zen; beste batzuen aukerei itxaron gabe, erabaki zuten egitasmoa beren kabuz sortzea, betiere inguruko  komunitatearekin harremanean. Beste modu batera esanda, hiru migrazio prozesu transnazional, ehun batean hariak bezala uztartzen dira, bere zati indibidualen batura baino zerbait indartsuagoa eta ederragoa osatuz.

«Zuekin kontatu nahi dugu ez bakarrik gure ametsa beteko dugulako, baita beste amets asko betetzen lagunduko dugulako ere», diote CostureArteren sortzaileek.

Istorio honen jatorria Arraianas Elkarteak antolatutako joskintza sortzaileko ikastaro bat da; bertan sortu zen ez bakarrik arropak eraldatu nahi dituen egitasmoaren ernamuina, baita bizitzak bere errotik eraldatu nahi dituen proiektua. Gisa honetako proiektuek, honenbestez, argi erakusten dute Ekonomia soziala ez dela utopia bat: egunez egun, josturaz jostura eraikitzen den errealitate materiala da.

Berriz diogu: ez da joskintzako kooperatiba bat soilik. Gizarte eredu baten aldeko apustua egin nahi da, non emakume migratuak ez diren laguntzen zain dauden biktimak, beraien etorkizuna komunitatean eraikitzen duten kolektibo indartsua baizik. Era berean, Ekonomia soziala utopia akademiko bat ez dela erakutsi nahi da; kontrara, komunitatearen babesarekin eraikitzen den errealitatea dela argi azaleratu nahi da.